Вячеслав Абукаев-Эмгак

Ончылмут олмеш 

У авторын сылнымутыш толмыжо тӱрлӧ корнан. Кызытсе кумло-нылле ияшрак тукым нерген ойлаш гын, тӱҥ шотышто, ятырынже ик семынак возаш тӱҥалыныт. Эн ондак – «Ямде лий» газетын юнкоржо, вара вуз, «Сылнымут шыже» семинар-влак, пединститут але университет почеш – печать пашаште тыршымаш.

Зоя Дудина – Шернур кундемысе Марисолан шочшыжо. А Марисола школ, тусо сылнымут кружок да тиде кружокым вуйлатыше туныктышо-поэтесса  З.В. Ермакова нерген палыдыме еҥ кызыт укеат, манаш лиеш. Арам огыл 1995 ийыште, ты школын выпускникше-влакын возымыштым чумырен, посна книгам лукто. Зоя Дудина – нунын кокла гыч иктыже. Школышто – тале юнкор, Марий университетыште – тыршыше студентка, мер пашаеҥ, самырык автор, вара – Марий книга издательствын редакторжо.

Шӱлыкан, эсогыл ойган лирика, чон коржман, аван икшывым йӧратыме азап, тыгодым нимучашдымын илышым йӧратымаш – теве мо кышкареш калыплалтеш Зоян поэзийже.

Мыланем илышыштем тӱрлӧ произведенийым редактироватлаш пернен. Тыгак поэзийымат. Южо авторым лудат да шонет: тӧрлашат ок кӱл. От тӧрлӧ, но чонлан ала-можо ок келше, ок сите. Почеламутшат ок ырыкте, ок ойгырыкто, ок куандаре. А южо поэтым уэш-пачаш редактирователт да…

 

                      …Кугезе тошкемышке толын,

                      Шке тулык кодмем умылем.

                      Солен ужар шудым, трук кольым,

                      Кузе пӱчкылтеш тукымем.

  Але весе:

                      Мардеж почеш каяш йомартле.

                      Мардеж, келшет, лиям таҥет?

                      Таҥлан, манат, лийман куатле?

                      Садлан тый мый дечем тайнет?

Тыгай келгытым, образым, философийым Зоя Дудинан книгаштыже ятыр муаш лиеш. Да тудын ик почеламутшо весыжым ешара, шуя, эше келгемда. Чумыр ончымаште пӱтынь сборник ик шӱлышан поэмыла лудалтеш, йоҥгалтеш. А коклаште икмардарак почеламут, тыгыде кырча-марча вашлиялтеш гын, южгунам шомак авторым ок колышт (але автор шомак дене ӱчаша) гын, мо вара – чон йӱкан поэзий лач тыгаяк лийман огыл мо? Эн тӱҥжӧ: Зоя Дудина тидым шкат шижеш, муро олыкыштыжо кандывуй ден висвисым, мӱйшудо ден мамыкшудым ойырен мошта. Тугеже, пераже пӱсемме семын кажне пеледышын кушмо вержым шкак рашемда. Тудо кызытыт тидым пала. Поснак «Илышемын ийлажым ончен…» поэмыште авторын поэзий кумдалыкше эл кӱкшытан, тӱнямбал йӱканыш савырнен, лудшылан чоныш толеш.

В.Абукаев-Эмгак  

«Мый шкежат суксо омыл» книга гыч.

Йошкар-Ола, 1998 ий, пургыж тылзе. 





Зоялан серыш
Сайт радам
Яндекс.Метрика

 1