Аркадий Васинкин

Куаныме годым шортшо кумыл

Марий сылнымутышто Зоя Дудина (Глушкова) у лӱм огыл, тудым марий лудшо-влак шукертак палат. Икымше гана тиде авторын почеламутшо-влак 1970-ше ийла мучаште верысе газет страницылаште («Ямде лийыште», «Марий коммунышто», изиш варарак «Кугарняште» кояш тӱҥальыч. Шке ойлымыж почеш, тудо тӱҥалтыш произведенийжым визымше классыште тунеммыж годым, латкок ияшак, возен. Вес семынже лийынат кертын огыл. Молан манаш гын, тунам Марисола кыдалаш школышто сылнымутлан моткочак кумылан айдеме, Зинаида Васильевна Ермакова, пашам ыштен, марий йылмым да литературым туныктен. Йоча-влак тудын вӱдымӧ кружокыш уло кумылын коштыныт. Ты пагытыштак Зоя дене пырля кызыт кумдан палыме журналист да прозаик Юрий Соловьев, Марий кугыжаныш театрын талантан артистше, пеш самырык илыш дене чеверласыше Геннадий Васильев да шуко молат ты школышто шке творческий шулдырыштым пеҥгыдемденыт, искусство каваш нӧлталташ ямдылалтыныт. Уста туныктышо сайрак произведений-влакым верысе газетлаште савыкташ полшен. Тыгак литкружокын паша лектышыжым школысо кид дене возымо журналлаштат ужаш лийын.

Марисола школышто тунеммыж годым Зоя чыла вере шуаш тырша, ик эн тале активист лиеш, сандене тудлан тӱнямбалне кумдан чапланыше «Орлёнок» пионер лагерьыште канашат пиал логалын. Тидыже тудын шинчаончалтышыжым кумдаҥдаш, илыш умылымашыжым пойдараш чотак полшен.

Тудо 1962 ий 3 ноябрьыште Шернур районысо Купсолаште шочын, 1980 ийыште Марисола кыдалаш школым тунем пытарымеке, Марий кугыжаныш университетын историй-филологий факультетышкыже пура. Студент пагытыштыже ончычсо семын литкружок монь лийын огыл гынат, Зоя шке сылнымут пашажым вияҥден колташ кӱлынак тырша. «Поэт лияш пешак шуко палаш кӱлеш   шоненам, сандене тунам, студент годым, йӧршын гаяк печатлалтын омыл. Мыланем але кӱлеш кӱкшыт марте пешак тора манын шканем тунам пунчальым», - шарналта поэтесса.

Ончыклык сылнымут мастар тыгодым тӱнямбал, руш классик-влакын поэзийыштым веле огыл шымла, тыгак верысе писатель-влакын возымыштымат лудын шога, ятырыштым шкеныштымак вашлиеш, палыме лиеш, нунын деч эреак ой-каҥашым налын, полышым шижын шога.  Тыгодымак кертмыж семын республикыште эртаралтше творческий семинарлаште шке почеламутлажым темла. Туштыжо ӱдырым эрежак огыл гынат, чӱчкыдынак кумылаҥден шогеныт. Адакшым самырык пагыт, илышым куан шинча дене йывыртен ончымаш, шӱм-чон юарлымаш Зоя «Рия-рия» студент фольклор ансамбльыш конда. Тудо тӱрлӧ кундемлаште концерт дене коштшыжла, шке ончыклык творчествыжлан эркын-эркын кӱлешан материалым, илыш опытым чумыра.

Университетым тунем пытарымек, теҥгечысе студентка ончылно кушто пашам ыштыме нерген йодыш шоген огыл, тудо 1985 ий март тылзе гычак Марий книга издательствыште сылнымут редактор сомылым шукташ тӱҥалеш, моткочак уста прозаик, поэт да кусарыше Анатолий Спиридонов, редактор-влак Вера Милорадова, Раисия Апакаева  дене пырля тырша. Шуко але шагал 17 ий мастар специалист-влак деч редактор пашалан тунемеш, усталыкшым шуара, творческий шулдыржым кӱлынак пеҥгыдемден шукта.

Тӱҥалше поэтессан ойыртемалтше йӱкшӧ нерген икымше савыкталтше мурорлаҥгыже («Мый шкежат суксо омыл», 1998) лекмеке, В. Абукаев-Эмгак (книган редакторжо) пешак чын палемден ыле: «Шӱлыкан, эсогыл ойган лирика, чон коржтен,аван икшывым йӧратыме азап, тыгодым нимучашдымын илышым йӧратымаш – теве мо кышкареш калыплалтеш Зоян поэзийже» (В.Абукаев-Эмгак. Ончылмут олмеш // Мый шкежат суксо омыл, Йошкар-Ола, 1998, 3 с.).

Мемнан илышыштына куан ден ойго эреак йыгыре коштыт, сандене ни тӱргоч куанаш, ни утыжым ойгыраш огеш лий. Поснак ӱдырамашлан чӱчкыдынак азапланаш логалеш.

Зоя – ешан, тудо кызыт «Марий Эл» газетыште пашам ышта, а марийже – Республикысе пенсий фондышто. Ешыште кок икшыве кушкеш. Кугуракше Анна, Марий кугыжаныш университетыште, экономика факультетыште тунемеш, Ольош эргыже  - школышто. «Индешлымше ийла кыдалне мыйым кок Микале тулыкеш кодышт. Ончыч ачам уке лие, вара эргымым шем рокыш пыштышым. Ты пагытыште нимомат возен омыл манаш лиеш, чонем орланен, шӱмем коржын, илымат шуын огыл, а варажым, изиш жап эртымеке, почеламут корно-влак шкак шочаш тӱҥальыч», - шарналта поэтесса. Чыла нине событий-влак икымше книга лекме деч ончыч гына лийыныт, сандене тудын творчествыжым аклыше-влак чыланат ик йӱк дене Зоян ойган почеламутшо-влак нерген ойленыт. Чынак, «Шӱлыкан поэзий» деч моло тунам поэтессан чоныштыжо иланенжат кертын огыл.

Аван ойган мурыжо лудшо деке корным писын муын. Мутлан, марий калыкын кумдан палыме, йӧратыме актрисыже Маргарита Медикова 1997 ийыште Зоя Дудинан почеламутшо-влак негызеш «Авам дене пырля» моноспектакльым ямдылен да телеэкраныш луктын ыле. Актрисан тиде пашажым чыланат пешак тауштен вашлийыч, тудо калык ушеш кужу жаплан шарналт кодо.

Зоя Михайловна Дудинан, тӱрлӧ изданийлаште печатлалтше произведенийлажым шотлаш огыл гын, тачысе кечылан ныл посна книгаже савыкталт лектын гынат («Мый шкежат суксо омыл», 1988; Колыштса шӱшпык чон шортмым», 2000; марий да руш йылме дене савыктыме «Эрелан йӧратыме тат» (Я миг, влюблённый в вечность», 2004, рушлаш А. Спиридонов кусарен), творчествыже нерген шукыжак возымо манын огына керт. Сандене тудын сылнымутшо нерген икмыняр шомакым каласыме шуэш. Адакшым мутемым тичмаш творчествыж нерген огыл, а посна книга шотышто лукнем. Нылымшыже – «Ойырымо ойпого» – нерген. Тыге маналтеш Зоя Дудинан 2006 ийыште  савыктен лукмо у книгаже. Тиде марла изданийым печатлен лукташ М.А. Кастрен лӱмеш ушем (Финляндий) да мер калык полшеныт. Тудо тӱжвал сынже денат, содержанийже денат палынак ойыртемалтеш (Сӱретче – Венера Березина. Книга комым Ирина Шехурдинан «Курымашлык тат» сӱретше дене сылнештарыме. Чаманен каласаш логалеш, тиде мастар художникын ик эн пытартыш пашаже, тудынат ӱмыржӧ пеш самырыкак лугыч кӱрылтӧ). А лектыш чынжымак сай: арамлан огыл 2006 ийыште республикыште эртаралтше конкурсышто «Эн сай авторский книга» номинацийыште, «Ойырымо ойпого» сеҥышыш лектын.

Книгашке авторын тӱрлӧ ийлаште возымо да тӱрлӧ сынан эн сай произведенийлажым чумырымо, сандене тидыже поэтессын творчествыжым мыняр-гынат тичмашынак ончалаш йӧным ышта, шонем. Книга кугыт шот денат изижак огыл, 256 страницан, шым ужаш гыч шога: «Мый шкежат суксо омыл», «Колыштса шӱшпык чон шортмым», «Эрелан йӧратыме тат», «Нылле ик порылык», «Саликалан малтыммуро», «Ида шылтале шӱлыкемлан», «Николай Заболоцкий» - тыге лӱмдалтыныт нине йыжыҥ-влак. Икманаш, нине вуйлымаш-влакым ончалмеке коеш: тиде изданийыште сылнымут мастарын творчествыжым кумдан авалтыме. Ӱмбач шергалын аклымаште Зоя Дудинан поэзийыштыже эн ончычак теве мо палдырна. Авторын ятыр почеламутшо чынжымак шӱлыкан да ойган. Тудо йӧратымаш темылан путырак кумылан, калык мут поянлыкым, шочмо вер-шӧрым, пӱртӱсым сайын пала, тудым келгын шижын да лудшылан ӱшандарышын сӱретлен мошта. Поэтесса тыгак йытыра шомакым, образ-влакым кыртмен кычалаш йӧрата, нунын дене мастарын пайдалана. «Тыгай сылне мут радамым, строкасе тӱҥалтыш да мучаш рифмым, векат, калык фольклорышто (калык шомак тыште уто – А.В.) веле муат. Поэтессан возымаштыже «вырляҥге мландым пӧрдыкта», "ший гармоньжо шем зияным шияҥда», "шем шоптыржо пакчаште пудештылын кӱэш», «Луман йӱштӧ ош шӱртыла мландыш шуйнылеш», «Тулвуйжат шкет ок йӱлӧ», «Мардежат  марла пелештен колта». Икманаш, тыгай сылне корнылам кажне почеламутышто, поэмыште тич муаш лиеш. Сандене «тыгай поэзийым лудмо да лудмо шуэш, а авторжо верч, куанен, порын кӧраныме шуэш», – возен ыле ик рецензийыштыже Вячеслав Абукаев-Эмгак («Шыпланымын помыжалтме татше» // Кугарня, 1998, 1 май.

Зоя Дудинан «Ойырымо ойпого» книгаш пурышо южо произведенийже  чынжымак калык мурым шарныкта, но лач ӱмбач ончалмаште веле:

 

Куанышым куэм ӧндал,

Ваштар дек толын – воштыльым.

Писештым пистерем ончал,

Шопкер пелен мый шойыштым (12 с).  

 

Почеламут кужу огыл, улыжат вич куплетан веле. «Шопкер пелен мый шойыштым»  строкам автор умбакыже монда да огеш «умылтаре» гын, лудшылан лач ӧраш веле кодеш ыле, но финалыште нине корныла-влак вестӱрлемын рашемыт, сандене чылажат веран верышкыже шинчеш:

Куэм шарнен куанышым,

Ваштарым колышт воштыльым,

Писештыш илышем пистер,

Да шорто, чаманен, шопкер.   

 

Чынжым гын тыште автор фольклорын лач формыжым веле кучылтеш, почеламутын содержанийже вестӱрлӧ, утларак оҥай, келге да поян. Калык ойпогышто ни «шойыштшым чаманыше шопкерым», ни «илышым писештыше пистерым»  ме огына вашлий.  

Икманаш, Дудинан поэзийже ойыртемалтше, тыште нимогай кӱсынлымаш ок шижалт, у книгаште тӱҥ шотышто авторын ушыштыжо волгалтше сылне образ-влак гына озаланат. Конешне, тидын годым мый кумалтыш мут негызеш шочшо почеламут-влак, Николай Заболоцкийым кусарыме але аза малтыме муро-влак нерген ом ойло. Нунын шке шочмо историйышт, сылнылык ойыртемышт уло.

«Кумалтыш мут негызеш шочшо почеламут-влак нерген мом каласен кертам? Мый христиан религийымат палем, но чонемлан утларак чимарий юмыйӱла лишыл. Мыйын ачам карт лийын, сандене ешыштына ме шке марий йӱланам пеҥгыдын шуктенна.  Адакшым ачамын кумалтыш мутым возыман икмыняр тетрадьше уло. Мый произведением-влакым нуным тӱткын лудын, сайын пален, ачамым шарныме лӱмеш возенам», - рашемда поэтесса.

Азам малтыме муро але «Саликалан малтымуро» (Мый гын ты шомакым кок «м» дене возем ыле, марий йылмыште «малты» мут уке – А.В.) ужаш нерген нимом шуко ойлаш. Ик могырым, тиде раздел руш фольклор негызеш иланен. Тидын нерген автор икана шкежак палемден ыле. Вес могырым, ӱдырамашлан, авалан азам малтыме муро деч посна нигузеат ок лий. Эн ончыч нине муро-влак авторлан шканже моткочак кӱлыныт, сандене нуно Зоян икшывыж-влак дене пырляк шочыныт да варажым кагазыш возалтыныт.

Николай Заболоцкийын произведенийлажым кусарыме сомыллан, мыйын шонымаште, поэтессым эн ончычак журналист да шымлызе Руслан Бушков кумылаҥден. Чыланат палат: кугу руш поэт Николай Заболоцкийын самырык жапше Шернурышто эртен. Тудлан шӱдӧ ий темме вашеш 2003 ийыште республикыштына ятыр оҥай мероприятий-влак эртышт, а поснак кугу пайрем Шернур селаште, 2-шо номеран школ пелен ыле. Тышке поэтын родо-тукымжат толын, Р.Бушковын Николай Заболоцкий нерген каласкалыше «Государство ромашек» (2003) книгажын презентацийже лие. Лач тиде изданийышкак Зоя Дудинан Николай Заболоцкийым кусарымыже икымше гана тыге тичмашын пурталтын. Кусарыме почеламутшо-влакым поэтесса тунам калык ончылно шкежак йоҥгалтарен. Тудо Заболоцкийын витле наре почеламутшым марлаҥден, тышечын латнылытшым, эн сайын кусарымыжым, «Ойырымо ойпого»  книгаш вераҥдыме. Вот тыгай кӱчык историй нине кум раздел шотышто, а умбакыже адакат Зоя Дудинан поэтический ойыртемже нерген.

Автор нигунамат ойгылан вуйым огеш пу, шканже шукертак рашемден да сайын пала: туддене мӱндыркак от кае.

Ал снеге гай куан саскам

Лиеш мо ШЕМЫШТЕ муаш?     

- йодеш поэтесса лудшо дечын (Каен йомам шем чодыраш», 28 с.).     

«Мый шкежат суксо омыл…» ужашым «Илышемын ийлажым ончен» поэма мучашла. Тиде публицистический сынан произведений мемнан кызытсе пагытлан пӧлеклалтын, тудын ойыртемалтше тӱрлӧ йыжыҥлажым сӱретла, поэтесса поснак Афган, Чечнясе сар-влакым карга. Икманаш, поэмыште авторын гражданский позицийже раш палдырна. Тыгодымак, ӱдырамаш семын, ава семын, тудо сареш так арамак йомшо самырык салтак-влакын родо-тукымышт верч азаплана. Зоя Дудинан творчествыштыже поэма жанр кугу верым огеш нал, тудо утларакшым кӱчык лирический почеламутлан кумылан.

«Ойырымо ойпого» книгашке тыгак посна еҥлан пӧлеклалтше произведений-влакым (Николай Заболоцкийлан, Сергей Чавайнлан, Йыван Кырлалан, Юрий Чавайнлан, Валентин Колумблан, Зинаида Ермаковалан, Геннадий Васильевлан, Виталий Макаровлан, Валерий Мочаевлан, Василий Павловлан да шуко молыланат) ятырак вераҥдыме. Нине произведенийлаште автор герой-влакын шочмо Шернур кундемыштым, ялыштым, але профессиональный мастарлыкыштым ончыл верыш шында. Мутлан, Валентин Колумбын шочмо верже Морко кундем, сандене «Валентин Колумблан» почеламутыштыжо автор талантан марий поэтын кок эн кугу ойыртемжым палемда. Ончычак тудын турий муро гай яндар йӱкшӧ шоныдымын-вучыдымын шыпланымылан ойгыра:

Торжа койыш верчын поэтын шӱм шеле,

Порволыш кава гычын муро турий.

А варажым, пытартыш корнылаште, поэтесса моткочак сылне да чын иктешла:

Камвозо кава гыч чоҥештыше кайык

Чылаштым ӱжшӧ эре чоҥешташ.

Туддечын посна илена пеле айык,

Туддечын посна чоннажат – сар лышташ (140 с.)

«Илена пеле айык», «чоннажат сар лышташ» - нине шомаклаште пеш шуко авалтыме. Автор шыже йокрокымат, чон ойгымат, пусталыкымат шотыш налеш.

Пытартыш жапыште марий поэзийыште ӱдырамаш-влакын ойыртемалтше йӱкышт нерген шуко ойлат. Чын, нуно пӧръеҥ дене таҥастарымаште, вес семынрак куанат, ойгыренат чотрак моштат, чон шижмашыштат утларак келге да пӱсӧ. Пӧръеҥ поэзий утларак рациональный гын, ӱдырамашын – эмоциональныйрак, кӱчыкын тыгерак иктешлаш лиеш ыле, очыни. Чылажат тиде тыглай схеме веле. Поэзийым лач тыге гына аклаш нигузеат огеш лий. Мутлан, Альбертина Иванован, Валентина Изилянован да Зоя Дудинан произведенийлашт пешак чот ойыртемалтыт. Нуным икте-весышт дене лугаш огеш лий. Тыгак Вячеслав Абукваев-Эмгакын, Геннадий Сабанцевын але Анатолий Тимиркаевын почеламутлаштым от путае. Поэзийыште шке ойыртемалтше мурет, индивидуальный йӱкет уке гын, кеч ӱдырамаш але пӧръеҥ лий, лудшын чонышто нигунамат верым от му.

Мо ӱдырамашлан утларак шерге? Тиде – шочмо кундем, сурт (Тушечын кайыкла чоҥешта, ойырла гынат нигунам монден огеш керт), еш, икшыве (орлыкышто шочыкта, сандене йочаже нимо деч лишыл). Тыгак Зоя Дудинан поэзийыштыжат: шочмо Купсолаже, шеремет Шернуржо тудлан эн шерге улыт. Шочмо мӧҥгӧ Зоялан – кинде сукыр. Тушто кужу жап огеш лий гын, поэтессан мурыжо ойгаҥеш, шыплана:

Уке. Тыге – нимат шот огыл,

Вуча гын садеран урем,

Сар шӱшпык шичме укшым тодыл,

Кукун шкет мурыжым мурем (15 с.), –

лудына ме «Шкетын» почеламутыштыжо. Шочмо ял, творческий шулдырым пуышо Марисола школ, сылнымут мастарын ешыже, шочшыжо, утларакшым илыш дене вучыдымын чеверласыше эргыже тудын поэтический корнылаштыже шагал огыл верым айлат   («Сортам чӱктем»,  «Мыйын эргым суксо гае», «Коленам эргымлан» да ятыр молат).

Марий сылнымутым шымлыше Соня Манаева-Чеснокован «Художественный мир современной марийской поэзии» (2004) книгаштыже «Драматизм поэзии Зои Дудиной» посна раздел уло. Мутат уке, кажне еҥын шке умылымашыже, сылнымутым, поэзийым аклыме висаже лийшаш, сандене шымлызе дене ынем ӱчаше. Адакшым вуймутыш лукмо «драматизм» шомак тыште лач шке верыштыже ман пеҥгыдемдынем. Тыгодымак ойго ден драматизм  кокласе  пешак кугу ойыртем нерген шижтарыман. Такого танца с горем «шем ойго ден куштем мый, шинчем ӧндалалт» в марийской поэзии еще не было» (170 с.), палемда тудо. Чын, лач тыгай строка-влак лийыт гын, авторым плагиат манын титаклыман ыле, но марий поэзий шочмыж годсекак ойгылан пешак поян. Шарналтена, мутлан, «Салымсола покшелнет» калык мурым, Николай Мухинын, Михаил Иванов-Батракын «шинчавӱд йӧре возалтше» почеламутлаштым да молымат. Тыгай марий еҥын пӱрымашыже, сандене тидыже мемнан поэзийыштынат коеш. Тыште, марий поэзийыште, илышыште могай-гына ойго, шӱлык уло, чыла верешташ лиеш.

Зоя Дудиналанат ятыр ойгым чытен лекташ, йӧсым сеҥаш логалын, тидын нерген лудшо-влакым палдарышым. Кажне событий творческий айдемын пашаштыже келге кышам кода, тидат раш. Тыгодымак поэтессан биографийже гыч коеш, кугу ойго пагытлан тудын поэзийже шыплана. «Мый тыгай годым почеламутым возымым чарненам ыле. Кумылем ыш лий – шым возо. Кеч мыйын поэзием шӱлыкан маныт, но мый почеламутым возымем годым могай-гынат куаным шижме пашам ыштем», – тыге Зоя шкеже каласкала.

Моткочак ӱшандарыше шомак-влак улыт, лачак ойгым чытен, сеҥен лекше айдемын шӱм-чоныштыжо гына келге шижмаш шочеш. Илаш, ончык ошкылаш вий-куат кодын огыл, но – кӱлеш, эше ыштышаш сомылет, родо-тукым ончылно порысет (долгет) уло…

А, чонем, яндар улат – пеледыш?

Але ом логал узьмак тӱняш?

Ах, колем ыле, товат, лиеш гын…

Ӱдырем вашлийым пӧрт тураш (32 с.).

Чынак, авалан илыш вийым лач икшыве юзо памашла чарныде ешарен шога. Теве тыгайрак кумылеш, чон шижмашеш илана да вияҥын толеш Зоя Дудинан «Драматизмже», тачысе поэзийже. А драмын пытартыш кӱкшытшӧ, тошкалтышыже, чыланат палат – трагедий.

Поэтесса шем поргемым, трагедийым эплын кораҥ эрта. Тудо пеҥгыде характеран айдеме, сандене почеламутшо-влакат ончыкылыклан, пиаллан волгыдо пагытлан ӱшаным шочыктат.

Куаныме годым ала-молан шортым,

Пакчаште пудештылын кӱын шем шоптыр –

Лектам да погем тамле емыжым куршыш,

Пурем да велем тыйын ныжылге урзыш.


Шем шоптырын шадырге тамжым ом орло:

Шем кочо саманын озаже – ош орлык.

Тамлен лач палет чон кычалме шомакым,

Да илышын шылтыме сылне шоякшым.

Куаныме годым садлан дыр мый шортым (16 с.).   

- лудына ме «Куаныме годым» кӱчык почеламутыштыжо. «Пакчаште пудештылын кӱын шем шоптыр» манын тымарте нигӧ каласен огыл. Дудинан тиде образше чынжымак у, ялысе айдемылан – да оласыжланат – пешак раш да сылне. Моло произведенийлаштат ужына, тудо ойгылан, шӱлыклан озаланаш эрыкым огеш пу. Кеч-могай неле пагытыштат чытен лекташ вийым, ӱшаным, эҥертышым, шотым муэш, садланак шке ончыланже кӱлешан задачым, йодыш-влакым эртак жапыштыже шындаш тырша. Тудо изи куанланат йывыртен, юарлен мошта:

Мый кычальым турням садыштем, да

Кидышкем толын шинче киса (20 с.),

- палемда автор «Шкет кодын» почеламутыштыжо.  Образ у огыл («Лучше синица в руках, чем журавль в небе» - тыгай руш калыкмут уло – А.В.), но тиде шонымашым автор мастарын марлаҥда, сандене тудым кӱсынлымӧ манаш йылме огеш савырне. Мутлан, тыгак йӧрата тудо шке ончыланже тӱрлӧ вучыдымо йодыш-влакым шындылаш. Тиде йодышыжо-влак южгунамже риторический лийын кертыт:

Мо пӱралтын чыла чоныш налын,

Илышаш куанен да чытен.

Кӧ ойлен «Илышна – модыш» манын?

Кӧ каласыш: «Чыла… - манн – пытен»? (17 с.).

Зоян почеламутшо-влак сылне образ-влаклан моткочак поян улыт, тудо шинча ончылно яндарын волгалтше сӱретым тыманмеш кычал муэш. Тыгай, мутлан, «Вырляҥге» почеламутшо:

Мӧдывуй гыч мӧдывуйыш

Ош вырляҥге выргыкта.

Шыр ончалын курык вуйыш,

Мландым шкетын пӧрдыкта.

 

О мыняре сото кумыл!

Сылне семым сотара,

Вет тудлан огеш кӱл кумыр! –

Муржо чоным пойдара (22 с.).   

Пешак чатка ритмике, тунамак проста раш рифме-влак, оҥай образ да кава марте шыжалтше чон куаным шижына ме тиде почеламутыштыжо. «Куаныме годым шортшо кумыл» - тыге палемдаш лиеш, очыни, тудын эн тӱҥ творческий ойыртемжым. Икманаш, Зоя Дудина шке жапыштыже да кӱлеш верыште ош тӱням ужын, сандене тудын тврческий корныжо писын волгалтше да пиалан манын кертына.  

Эн сай икмыняр почеламутлажым рушлаш кусарен «Антология» литературы финно-угорских» народов» (Екатеринбург, 2006) книгаш пуртымо. Тыгак ме тудын возымыжым да эстон йылме дене лукмо «Антология финн-угорской поэзии» (Таллин, 2006), книгаште ужын кертына.

Тудо «Мый шкежат суксо омыл» книгажлан да А.С.Пушкинын йомакше-влакым марлаҥдымыжлан М.А.Кастрен лӱмеш общестын литературный премийжын лауреатше (Финляндий, 2000), Марий Эл тӱвыран сулло пашаеҥже (2000), Россий писатель ушем член (2002) улеш.

«Ончыко», № 2006 ий             

 

 

 





Зоялан серыш
Сайт радам
Яндекс.Метрика

 1