Мый тымык отышко толам…

Чимарий тӱня

Сандалыкын мучашдыме аҥаште,

Ош кече йыр со пӧрдшӧ Мландынаште,

Йӱреш нӧрен-кошкен – чон волгыдемын,

Кучен саманын тале вӱдпӧрдемым,

Ила кугезе мланде – чимарий тӱня.

 

Ила чевер пӱртӱс лоҥгасе калык

Коча-кованан сугыньым шукталын,

Поян йӱла гычын поген вий-алым,

Куатле шочмо мландым йӧраталын,

Кугу Ош Юмылан чолган кумалын.

10 сорла 2003

*Нине почеламутлаште «Поро Юмо», «Ош Кугу Юмо», «Юмо»

 манын возымо годым «тӱня, сандалык, пӱртӱс» манмым умылыман.


Агавайрем годым

Агавайрем кугу юмо, Тӱня юмо,

Кече-ава, сорла Тылзе-ава,

Кӱдырчӧ юмо, Волгенче ош юмо,

Мланде-ава, тендан деке кумалмына шужо.

 

Шошо ага сомылнам шотыш кондышна,

Нурысо киндынам шочыктен шогыза.

Йӱштӧ деч, шокшо деч мелын аралыза,

Неле йӱр пыл деч, мардеж деч серлагыза.

Чон йодмынам ме тичмаш мелна дене,

Кинде-шинчал дене, ӱй-туара дене

Сӧрвалена да кумал шогена.

 

Поро серлагышым тӱрлӧ пашаште:

Комбо кашта гай кылтам кылдымаште,

Шӱдыр гай сото копнам оптымаште,

Идым-агун сомылкам шуктымаште.

Тиддеч вара йодына ме перкем

Ончыл тичмашым тендалан нӧлталын шындаш,

Кодшо шеҥгелжым шым ийлан ситараш,

Пуыза перкем.

 

Пуыза серлагышым мӱкш ончымаште,

Шошо эрден мӱкшаваже лекмаште,

Сылне кеҥеж кечын иге модмаште,

Ямле саска гыч саскашке шумаште.

Агавайрем юмылан вуй савал кумалаш,

Йодын кумалмынам ужын илаш,

Сурт гычын йотышко лектын кошташ,

 

Поро тазалыкым шулыкым пу(ы)за.

Нур ото гай атыланыл илалын,

Нур куэ гай йолвалалт ошемалын,

Ик ияш воштырла ӱмыр шуялын,

Кӱ курык гай куанен юарлалын,

Курык ӱмбал саска гай пеледалтын,

Эр ӱжарала эрдене волгалтын,

Эр кече гае шарлен да нӧлталтын,

Ий гычын ийыш ашнаш йодына.

 

Кумыл ойнажым ӱлӱл тӱтыра,

Кӱш кӱзыктал, а тиддечын вара

Йодын кумалмым кӱшӱл тӱтыра

Ӱлык волтен пу да йывыртыктал.

Пеледыш 2002

 

Кугече сортам чӱктымӧ годым

Киямат тӧра, сортам чӱктем, 

Ош Кугече кечын тыйым сӧрвалем:                                       

Колто тоштыеҥым мый декем,                                           

Нунын таче – Кечыла пайрем.                                                                                    

Толза, ачием ден авием,                                                

Лийза унаеҥ, кочам ден коваем,                                      

Кӱдыкем тол, эргым-икшывем,                                      

Чылалан саска сортам алал пуэм.                                       

Авызлал мелнам: мелна-мелнан шужо,                            

Пулашка ден шӱрашкогылят шужо,                                        

Чывышӱр, пучымыш, туара шужо,                                    

Пӧчыжвӱд, шоҥан пура, пӱрат шужо.                              

Тек эрта йомартлын пайремна,

Ожнысылак те лӱҥгалт-мурен коштса,

Вашлияш вуча ял уремна.

Ӱжмӧ унадам пырля-пырля ӱжса.  

Ида кай суртнам, ялнам ятлен.

Сурт-озанлыклан, ешлан тазам йодам.

Улыжлан пиал перкем темлен,

А укежым улыш савыраш сӧрен,

Чылаштлан серлагышым йодам.

Лишыл-мӱндыр, кайыме-толмо корныштат,

Тул деч, вӱд деч, йот тушман дечат

Арален, чоннам серлагыза!                                                                                      

5 вӱдшор 2002

 

Мланде-авалан

 

Мланде-ава, Кугу Юмо,

Вуйым савен, она лӱшкӧ.

Йӱр тӱтыра вола ӱлык,

Эл тӱтыра кӱза кӱшкӧ.   

 

Кок тӱтыра коклаш лийын,

Эр кече гае нӧлталтын,

Ош тылзе гае темалтын,

Ал саска гай пеледалтын,

Поро еш ден илаш пӱрӧ.                                        

 

Шочшылан лийже уш-акыл:                                               

Кӱкшӧ каван гае капым,                                                  

Кӱшӧ шергинде гай чапым,

Поро серлагышым пӱрӧ! 

14 пургыж 2001                                                                                   

 

* * *

О Поро Юмо! Чоныш пуро.

Да полшо мыланем ласкан илаш.                                     

Тений йӧршеш утен чон муро,                                            

Чон почын, ойгым нигӧлан ойлаш!

 

Пурлаште – пурлагай-влак пурыт,                                    

Шолаште – шолагай-влак шояклат.                                  

Тыглай айдемын кинде шултыш

Эреак шомакан – тыге аклат.                                             

 

О Поро Юмо, шем осалым,

Пычкемыш шӱлышым поктен колтал!                              

Куатле кӧргӧ вийым-алым,                                                 

Чон тымыкым кава гычын волтал,

О Поро Юмо!..

 

* * *

Поро Юмем, тый дечет мый йоднем

Кечын – ош сотым, тылзын – тичмашым.

Эр Чолпан дене мый нӧлтын моднем,

Йӱд тӱтыра тек куча илыш касым.

 

Тыйын пелен мылам лӱдыкшӧ огыл,

Мландысе илыш пеш сылне, товат!

Пӱрымӧ пайыл – пеледше мӱй олык…

Поро Юмем, кугу тау тылат!

21 кылме 2004

 

   * * *                                                

Шорыкйол сортам чӱктем,

Кугу Юмо, ончылнет

Сорта тул гае чӱчкем,

Чон муремым рончынем.

Тыйым чон ден йӧратен,                                                        

Тылат веле ӱшанен,                                                               

Илыш кечылам рат ден

Эртыш, чыр ден ӱчашен.

Очыни, шонымаштем,                                                                                

Йылмем ден ойлымаштем,                                                              

Еҥ ӱмбак ончалмаштем,                                                           

Сомылем шуктымаштем                                                         

Сулыкыш мый пуренам,                                                        

Йоҥ(ы)лыш мурым муренам -                                                   

Языкемым касарал.

Пӱрышемлан каласал:                                                            

Йӱштӧ дечат сакленда,                                                              

Шокшо дечат сакленда,                                                          

Кинде аҥа шурнаҥын,                                                              

Вӱта кӧргӧ улаҥын.                                                                          

Талук мучко тыршымем                                                                                                         

Арам ыш лий. Пӱрышем,                                                      

Ешем ден келшен илаш,                                                        

Пайрем годым куанаш,

Ойго годым ваш полшаш,

Тыланет кумал илаш,

Кугу Юмо, йӧным пу!                                

6 шорыкйол 2002

 

Кочкаш шичме годым

Юмо, тол!

Пӱрышӧ, тол!

Суксо, тол!

Сай ден поро,

Ӱстелтӧрыш тол!

Кинде-шинчалнажым высмылте!

Сай серлагыш ден перкем ыште! 

Кочкын лекме годым

Юмо пӱрымым кочкым,

Юмо велымым йӱым,

Юмын пӱрымым муым,

Пӱрышем, кугу тау!

22 ага 2005


Кӱсотышто

 

Ош Кугу Юмо! Кӱсотышко толын

Уло марий калыкет. Йодына:

Полшо илаш мыланна Онар семын,

Тые кодет гын, ме йылт йомына.

 

Эр кече гае кава дек нӧлталтын,

Ал саска гай тӱзланалын пелед,

Тек илышна вияҥеш ончык сайын,

Тек шем кава мландынам ок левед.

 

Ош Кугу Юмо, осал деч арале,

Йӧрдымӧ койыш деч полшо утлаш.

Сай шонымаш ормыж дене варналте,

Оҥго гай орлыклан ок кой мучаш.

 

Пу шӱм-чонемлан арулыкын нӧшмым,

Мые полшем нерешташ да шыташ.

Вот лач тунам тые мыйым кеч нӧштыл,

Кызыте полшо осал деч утлаш.

Пеледыш  2002

 

Мый тымык отышко толам…

                    "Ик тымык ото уло мемнан элыште…"

                                                        С.Чавайн

Мый тымык отышко толам,

Кугу ер серыш волалам,

Ладыра пушеҥгым ӧндалам,

Саска пеледмым колыштам.

Сар шӱшпык таҥ ден пелештем,

Яндар памаш ден мутланем,

Ужарге шудыш шуҥгалтам,

Пеледыш лийын волгалтам.

 

Тыге ме отым йӧратен,

Поэтын сугыньжым шуктен,

Марий чоннам аралена,

Ош Юмылан тауштена.

21 шыжа 2005

 

Ойго годым

 

Кугу Юмо, улат гын, утаре!

Тый арале ешем — чон сортам.

Полшынет гын, сапетым луштаре,

Ончылнет кумалам да шортам.

 

Неле нелытым лывырге вачыш

Пыштенат да поктет, томаша.

А шӱртнем, камвозам, ом кынел гын,

Кӧ толеш кид шуялын полшаш?

 

Мый ом пале: могае ой дене

Тый денет кутыраш? Сӧрвалаш...

Вет мылам изинекак ойленыт:

Пӱрымаш ден кӱлеш серлагаш….

1994-2002

 

Серлагышем

 

Серлагышем - чонем сӧрвалышем,

Мый ятыр тыйым вургыжтарышым.

Келесыр ой денат сӧрасышем,

Ош кечым тый дечет мый арышым.  

Могай тыматле, чытыше улат! -

Ош суксо гай йырем чоҥештылат,

Кунам осал вий тумасен урла,

Йырем аралтышым оҥгештылат.

Камвочмо годым кидым шуэнат,

Почаҥме годым вийым пуэнат, 

Чыла удажым ӧрдыж шуенат,

«Илаш! Илаш!» – мылам тый шӱденат. 

Илаш... Молан арам так ойлышташ?

Сайрак вет чыным вигак каласаш:

Перненыс йылтак йӧрдымо лияш,

Ты илышлан «от кӱлымат» колаш.

Тунам, тунам лач икымше гана

Мый шижым лош рӱпшалтше кумылет,

Тыге рӱпшен мыйым авам гына...

Тыге авам гына... Тый умылет?..

19 ӱярня 2002

 

Чон вургыжмо годым   

 

Ош Кугу Юмо, шинчатым ит кумо,

Вуйым рӱзен ит шылтале чонем.

Мый – икшывет лач – пеледын шым умо,

Но шке киндемым тыршенак онем.

 

Тыйын пелен вел улам мый айдеме,

Тыйын пелен вел – пӱртӱсын йоча.

Молан вара шӱлыкаҥше эрдене

Шем Керемет мыйын чоным яча?..

2002

 

  * * *  

Шым кече, шым юмо, шым суксо,                            

Ик кече гыч весыш тошкалын,                                   

Арня гыч арняшке вончалын,                                     

Ик ий гычын весыш эрталын,                                          

Ош Кече-авала нӧлталтын,                                         

Ош Тылзе-авала волгалтын,                                        

Ший Шӱдыр-авала йолгалтын,                                    

Саска гай умен-пеледалтын,                                                                                                            

Варсеҥгыла ваш  вычыматыл,                                    

Илаш поро шулыкым пу(ы)за!                                   

Осал тушман дечын пыдалын,                                   

Осал шӱлыш дечын пырдалын,                                  

Осал шоныш деч утаралын,                                       

Серлагыш-аралтышым пу(ы)за!        

Ӱярня 2004

                                             

 * * *

Вуйӱмбал Кугу Юмо,

Ий гыч ийышке, тылзе гыч тылзыш,

Кече гае эрдене нӧлталтын,    

Шӱдыр гае шем йӱдым волгалтын,

Порсын гай вусолалт* ярымлалтын,   

Умла гае пелед оваргалын,    

Шыште гай ӱмыремым шуялын,

Модын-воштыл илаш мылам полшо:

Сай тазалыкым, шулыкым пӱрӧ!    

8 пургыж 2001

* Вусолаш – йылгыж-волгалташ.

 

Кугарня кечын 

 

Кайык гай вычыматен,                                                                                                                             

Саска гае тӱзланен,

Кече гае кӱш нӧлталт, 

Порсын гае ярымлалт,

Тылзе гае раш волгалт,

Сулык ой деч аралалт,                                                             

Иза-шольым пагален,                                                                                   

Ваш-ваш шокшын йӧратен,

Ачием ден авием,

Икшывем ден пелашем,

Пошкудем ден йолташем,

Шочмо марий калыкем,                                                             

Кугарня кече вашеш

Чонна пырля ваш лиеш.                                                    

Айста Кугу Юмо деч

Ончыкылык пиал верч

Поро уш чолгалыкым,

Пеҥгыде тазалыкым,

У улан перкелыкым

Вуй савалын йодына.

8 шорыкйол 2002

 

Нылле ик поро

 

Нылле ик порым чонышко налын,

Нылле ик тушманемым тошкал,

Кугу Юмо пелен йывырталын,

Мый илем тауштен да кумал.

 

Неле-йӧсым сеҥем Юмо дене!

Ший куаным пайлем Юмо дене!

Мыланем ӱмырешлан аралтыш –

Кугу Юмын ош порсын лӱҥгалтыш.

23 шыжа 2004

   

Отышто ойлышаш кумалтыш мут

 

Поро Ош Кугу Юмо, онапу ончылан,

Ужар шаге воктен мӱй урватым шынден,

Кинде сукыр пыштен, немыр подым сакен,

Тӱсан комбо ден лудым тылат пӧлеклен,

Вуй савен кумалеш – ош марий калыкет.

 

 Шем вургемым кудаш, эре-ошым чиен,

Эре чон ден волгалт, ший сортанам чӱктен,

Шочмо мланде пелен, сото кече пелен,

Ужар сылне пӱртӱсын юж дене шӱлен,

Йӧным ыште илаш, Кӱдыратле Юмем.

 

Ме кугезе мландеш йывыртен ил(ы)нена,

Тоштыеҥын ой ден тый денет ойлена.

Чыла нелым сеҥен, ойго гочын шытен,

Осал дечын кораҥ, тушман дечын утлаш,

Калыкланна тый поро серлагышым пу.

 

Ты серлагыш пелен, поро шулыкым пу,

Шыште гай кумылнам перке деке шке лук.

Тӱнямбал кумдыкеш раш йоҥгалт, шочмо мут,

Тӱнямбал кумдыкеш чапланал, марий сурт,

Ош марий улмына – курымаш сугынь мут.

 

Ты серлагыш пелен яндарештше уш-акыл,

Шинчымаш дене илыже калык шӱм-чон.

Тыршымаш дене толжо куатле мастарлык,

Чумбылат да Акпатыр, Болтуш онна-влак,

Поро илышым ме сӧрвален йодына.

Юмо, серлаге.

 

Серлагышем

 

Серлагышем – вуй ӱмбалнем

Ош кече гае волгалтеш.                     

Кунам йӱдомо ден малем,

Ош Тылзыла йырем пӧрдеш.

Пычкемыш дечын шойыштен,

Ший шӱдырлажым ылыжта.                                                     

Пылвомыш ден  левед пыштен,

Сӱсанымемым ырыкта.

Пӱрышем ден ойым вашталтен,                                           

Вӱд-авалан вӱдаш темла.

Куатым, вийым капышкем                                                 

Мланде-ава деч нал тема.

Волгенче-кӱдырчым ӱжеш,                                                

Кунам уш лушкыдем шижеш.

Мер Юмым корнышкем луктеш,

Кунам перкелыкым ужеш.                                              

Тыгай улат, Серлагышем,

Куан, ойгем да пиалем.

Йывыртыктен аралышем,                                                  

Тылат кӧра эше илем…

29 ӱярня 2002 

 

Шарнымаш сорта

 

О Поро Юмо да Шочынава,

Пӱренда мыланем шочаш-кушкаш,

Йомартле калык ден кочкаш-йӱаш,   

Ӱмбалнем — ӱмырашлык ош кава.                                           

 

Но воктенем уке ачам-авам,

Моткоч йӧратыме йолташ-влакем

Лач тоштыеҥла толыт мый декем,

Нуным рӱпшен малта Мланде-ава.  

 

Мланде-ава, тый рок суратым поч!

Юмын-кава, кава суратым поч!         

Кок мланде, кок сура лоҥга гыч вошт

Волгалтын йӱлӧ, о саска сорта...

5 вӱдшор 2002

 

Эрден чоклымо мут

 

Эр Юмо, эр Суксо, Ош Юмо, ош Суксо,

Шочынава да Серлагышым пуышо,

Эргымым Пӱрышӧ, Илышым тӱзышӧ,

Чоным пуэн

            ойлымем

                     чоныш шужо.

 

Суртлан, ешемлан, шочшем-уныкамлан,

Поро пошкудо, йолташ, палымемлан,

Уло тӱнялан, марий калыкемлан

Эр ӱжара гай волгалт илаш пӱрӧ.

 

Порылык корно ден ончык наҥгае,

Сай сеҥымаш ден чоннажым семале.

Еҥ осал дечын, тушман деч арале,

Йывыртыктен, кумалмемым йӧрате!

7 вӱдшор 2002 

 

Кастене пелештыме мут

 

Кугу Юмо да Пӱрышӧ, Шочынава,

Сай тазалык ден шочын кушкаш пӱренда,

Ош сандалыкым шижын шӱлаш шӱденда,

Мыланем омыштат илыман пеленда.

 

Шӱдыран кава, полшо кид-йол лывырташ,

Мамыкан мланде, полшо капем кандараш,

Ӱжаран эр ӧндалже – чонем куанаш,

Сай серлагыш авалже – куатлын илаш!

22 ага 2002

 

Кугече-ош юмо!

 

Кугече-ош юмо, вӱчкалын йӧрате,

Тичмаш кинде гай оварген иланаш.

Тичмаш мелна кышыл, тичмаш пура ате,

Тичмаш тек лиеш илышна – куанаш.    

Куатле Кугече, тичмашлык ӱмбачын,

Варсеҥге гай вычыл, умла гай пелед,

Лай порсын гай ӱмыр шуяшлан тичмашын,

Уш-акыл ден шулыкым пеҥгыдым пу!   

Коштмаште осал деч, ок кӱл деч пыдалын,

Суртпечым тул-вӱд деч, тӱтан деч пӱял.

Осал шонен толшым мӧҥгеш савыралын,

Сай шоныш ден толшым вӱдалын пуртал.

Ик пырчым ӱдалын – тӱжем пырче шочшо,

Кумда нур ӱмбалне татулык волгалт. 

Межа кумдыкеш нӧлталтеш мемнан шочшо,

Тӱня кумдыкеш нунын йӱкышт йоҥгалт!  

Эсенлыкым пу(ы)шо Кугече-ош юмо, 

Кӱшычын – пылвомыш, ӱлыч – мланде сер,

Суратым кораҥдыл, кок чаплыкым поч!

Лӱҥгалтын вузалже марийын шемер!

Кугече-ош юмо, вӱчкалын йӧрате!

 6 вӱдшор 2002

 

Мер юмылан      

   

Еш кокласе вичкыж кылым,                                                                                             

Келшымашна уке-улым,                     

Чонеш вочшо шӱлык сеемым, 

Мер юмем, тӧрлен шогал!

 

Пошкудемлан сурт-оралтым,

Кинде дене темше клатым,

Шӱм-чонеш эн чынле ратым,

Мер юмем, темлен шогал!

 

Ял ден ял кокласе нурым,

Тӧрсыр корнысо шӱм мурым,

Йоҥ(ы)лыш ойлымо шомакым,

Мер юмем, аруэштал.

 

Чий вера ден вес вералан

Иквереш келшен илашлан, 

Эрык юж ден шӱлалташлан,

Мер юмем, йӧнештарал.

 

Чий йӱлана вес йӱла ден

Ок лугалт, волгалт йӱла тек.

Тоштыеҥын ой ила тек,

Мер юмем, шотлан кондал. 

 

Йылмына кокласе орым,

Ойыштем марийын чонжым,  

Чумбылат, Акпатыр онжым,

Мер юмем, тый аралал.                                                                                            

 

Тӱрлӧ калык келшымаште,

Тӱрлӧ калык шонымаште,                

Тӱрлӧ калык илымаште,

Мер юмем,  татулык лий. 

 

Эл ден эл кокласе шотым,

Сар тул ден авалтше сотым,    

Чонжо дене йомшо йотым,

Мер юмем, тый утарал!

Вӱдшор 2002

 

* * * 

О куатан Сандалык – Кугу Юмо!

Тӱняшке кондыметлан тау лийже.

Возеш гынат ойган чонеш шем юҥго,

Чыла сеҥаш сита айдемын вийже.

 

Торжалык дене модшо илышнаште,

Осал тушман ден неле вашпижмаште

Тый полшо мыланна илен лекташ,

Шке пеленетак икшыветла ашне…

2002

 

* * *

Ош Кугу Юмо! Чонем лыпландаре,

Чонлан эре ала-мо огеш сите:

Вот йыҥыса ынде коло ий наре,

Име мешак гай йылт лийыныс, витне. 

 

Уш мыланем кӱлеш, нелым сеҥашлан,

Акыл – сеҥен кертдымемым чыташлан.

Лийже мастарлык – куаным шижашлан,    

Лийже усталык – ойгем гоч шыташлан.

 

Ош Кугу Юмо!

Илаш мылам полшо,

Чонышко тымык да волгыдо толжо!

3 ӱярня 2002

 

Сулыкым касараш йодмо

 

Шонен коштынат, кутырен ыштенат,

Тыршен тыршенат, сеҥымаш ден волгалт,

Суапле Юмем, сулыкеш пуренам.

 

Еш дене илен, икшывемым ончен,

Шоҥгемме велеш уныкамым рӱпшен,

Суапле Юмем, сулыкеш кодынам.

 

Йӱмаш-кочмаштат, шийвундан лиймаштат,

Поянлык да пого нерген шоненат,

Суапле Юмем, сулык деч ом утлал.

 

Касаре шонен шуктыде ыштымем,

Касаре илен моштыде тыршымем,

Касаре, утаре йӱлалше шӱмем!

19 ага 2002

 

Шорыкйол пайрем годым

                                                

Ош лумын мландыш велме сем ден,

Марий яллашке Шорыкйол толеш.                            

Сий погышо, мӧчӧр-влак мур ден

Уремыш лектыт рӱж – йӱла почеш.

 

Пӱкш пудыртымо йӱк йоҥгалте,                                 

Шуэш мӱйпӱрым тамлыме жапет.

Кудалте, ӱдыр, кӱнчылатым,                                       

Мӧчӧр ден вескана кунам куштет?                            

 

Шӱкал тый ӧрдыж тӱрмеҥгетым –                             

Сӱан марте эше тӱрлен шуктет.

Мужед, кычал пиал-таҥетым,                                     

Вет шорык йол вел таче кидыштет…

9 шорыкйол 2002   

                          

* * *

Юмо-суксо! Осал шӱлыш дечын

Калыкем аралаш мый йодам.

Неле чер деч, титак сомыл дечын

Ош марийын ош чонжым лодал.

 

Юмо-суксо, уш-акылым пу:

Мо пӱралтын –  ласкан вашлияш,

Мо кертмемым  – чолган вашталташ,

Ӱмыремым куатлын илаш...

2002

 

* * *

Керемет-кугу юмо!

Тыланет кугу тау!

Йылморгаж шоктышемым,

Титакан койышемым

Умылен илаш туныктыметлан.

Орлыкан йолгорнемым,

Шӱлыкан шӱм-чонемым

Жапын эмже ден эмлыметлан.

2002

* * *

Ош Кугу Юмо, шинчатым ит кумо,

Вуйым рÿзен ит шылтале чонем.

Мый икшывет лач… Пеледын шым умо,

Но шке  киндемым тыршенак онем.

 

Тыйын пелен вел улам мый айдеме;

Тыйын воктен вел – пÿртÿсын йоча.

Молан вара шÿлыкаҥше эрдене

Шем Керемет

                  мыйын чоным яча?..

11-12 ага 1999

 

Шулыкым, серлагышым, перкем…

Шулыкым, серлагышым, перкем,

Поро Юмо, тый дечет йоднем.

Кидыш налын ош пиал теркем,

Порылык ден эрелан коднем.

 

Шулыкым, серлагышым, перкем –

Ешемлан, родемлан, тукымлан.

У паша ден шӱм-чонем терген,

Шочмо калыклан ласкам йодам.

2010

 

 

 

 

 

 

 

 

 

 

 

 

 

 





Зоялан серыш
Сайт радам
Яндекс.Метрика

 1