Кишке

Кишке

 

Ик изи ӱдырын аваже андри кочкышлан ик корка шӧр дене мӱгиндым пуа улмаш. Икана ӱдыр, ты сийым кидышкыже налынат, тӱгӧ лектын да тошкалтыш мучашке шинчын. Кочкышым ласкан гына тамлымыж годым тудын дек, кудывечыште илыше, шужышо кишке эркын лишемын. Кишке ӱдыр дек лишкырак да лишкырак верланен. Кочкышын тамжым шижын улмаш гын веле? А ӱдыр тӱрлӧ вольык ден янлыкым моткоч йӧратен. Санденак шем кишке деч тудо нигунар лӱдын огыл, шке сийжымат ты нушкын коштшо дене уло кумылын пайлен.

Кишкын ӱшанле да поро койышыжо ӱдырым моткоч куандарен. Тылеч вара тудо у йолташыжым чӱчкыдынак шкеж дек ӱжын да тамле кочкыш дене сийлен. Эсогыл ӱжмӧ мутшымат тудо шкеак шонен луктын:

 

Нушкын тол тый, кишке, мый декем!

Тыйым шӧр да кинде ден сийлем!

 

Кишке ӱдырым шуко вучыктен огыл, кажне Гана писын ӱдыр деке вашкен. Шер теммешкыже ӱдырын сийже дене сийлалтын.

Поро янлык изи ӱдырлан тӱрлӧ семын тауштен. Шке шылтыме поянлыкше гыч тудо изи йолташыжлан шергакан кӱм, ракывотым, шӧртньӧ сӧрастарыме ӱзгар-влакым кондеден. Тылеч вара ӱдыр утыр мотор да утыр ушан кушкын шогалын.

Но икана нушкын толшо кишкым ӱдырын аваже ужылалтен. Тудо шке шочшыжын ты чонан дене келшымыжым пален огыл. Сандене кишке чон падырашыжлан удам ышта манын пеш чот лӱдын. Кӱжгӧ тоям налынат, тудым перен пуштын.

Тылеч вара ӱдырын илыш радамже йылт пужлен, маныт. Тудо чӱчкыдынак черланен, аваж шинча ончылнак тазалыкше лунчырген. Икмыняр жап гыч суртышт деч тораштак огыл тумна тум-тумжым кычкырен, а эҥыжгайык шӱгар ӱмбак пышташ йӧрышӧ ужар укшым чумырен. А ик эрдене ава ӱдыржӧ деке пурен да ужын: падыраш икшывыжын чонжо каваш чоештен… Капшым Азырен поген налын. 





Зоялан серыш
Сайт радам
Яндекс.Метрика

 1