Ия ден ургызо

Ия ден ургызо

 

Ала-кунам пеш ожно илен улмаш ош тӱняште ургызо мастар. Тудо тунар пашаче да чулым лийын, вес тыгай чолга айдемым мланде ӱмбалне муашат ок лий улмаш. Шкенжым пеш тыматлын кучен гынат, кид-йолжылан акым сайын пален. Тыге икана тудо, шуко шоналтыде, воштылал каласен:

–  Вургемым пӱчкеден ургымаште мый Ия денат таҥасаш тоштам!

О, тыгай ойым пеш лӱддымӧ еҥ веле каласен кертын! Ӱдырамаш кайык гай чоҥештен лекше мутын куатшым шижынат шуктен огыл, тугай тӱтан тарванен! Ия вет тугай: пылышлан чоя, йоллан писе айдемым поктылаш эре ямде шога. Омса почылтын, ургызо ончыко осал шӱлыш кӱртньӧ шинчырым мурыктыл, воштыл пурен шогалын. Мемнан мастар ӱдырамашна чытырен-лӱдын, мутшым колыштын:

–  Тый мыйым таҥасаш ӱжынат! Ну мо, мый ямде улам тый денет вийым тергаш, - каласен Ия. – Кызыт ме кок икгай тувырым ургаш тӱҥалына. Мый ончычрак ургем гын, тыланет кугу ойго толеш. Тый тунамак мыйын почешем тамыкышке эртет!

Тыгай ой пеш шучкын чучын. Кеч-кузе толаша гынат, ӱдырамаш Иям сеҥен кертшашлык огыл. Тунам тудо иканаште чыла йомдара. Пиалдыме ӱдырамашын илымыже шуын. Но вес йӧн лийын огыл, тушман ден шинчаваш шогалде ок лий улмаш.

Таҥасыше-влак ик жапыште пашалан пижыныт. Мастар вигак лӱдын колтен: Ия мастарзе семынак вискаленат, писын да чулымын куэмым пӱчкеден оптен. Вара ургаш пижыныт. Осал шӱлыш тыштат ончыкрак лекнеже улмаш. Садлан шуко шоныде, кужу кидшылан ӱшанен, имыш кок меҥге наре кутышан шӱртым керын.

Вот могай томаша лектын: кажне изи пӱшкыллан тудо пӧрт йыр шым гана куржтал савырнышаш улмаш. Тиде ситен огыл, икымше ганаже так арамак куржталын: шӱртӧ мучашым кылдаш монден улмаш. А ургызо молгунамсылак урген: лачак икмыняр тӱткынрак да чатканракын пӱшкылаш тыршен. Тудо кӱчык шӱртым налын, кажныжым пышкемден кылден. Тыге пӱшкыл почеш пӱшкыл возын, сомыл ушнен толын, тувыр шинча ончылнак ургалтын! Пашам мучашлымеке, чолга ургызо у тувырым кужу шӱртӧ дене пӱтыралт пытыше Иян  вуйышкыжо чиктен.

Вожылмаш да шыде тул дене йӱлышӧ Ия сеҥалтын. Тудо тунамак мланде йымаке порволен, маныт. Тылеч вара пашам тыршен да чаткан ыштыше-влак коклашке тудо огеш лек. А мастар ургызо тылеч вара йылмыжым кучаш тунемын, маныт. Калыкыште тидын нерген эше шуко жап ваш-ваш каласкаленыт. Иктаж-кудыжо чап да сутланыше улмыжлан кӧра пашам писын пытараш толашен гын, ты мастар еҥ нерген шарныктеныт: «Ия гае толаша: ик пӱшкыл верч шым йыр куржтал савырна!» 





Зоялан серыш
Сайт радам
Яндекс.Метрика

 1