А. Селяков Пайрем

А. Селяков, коми прозаик

Пайрем

– Ну мом мый темлен кертам? Мо кодшо гыч тиде – эн сайже. Кечывалым пыштен кодаш йодам ыле, тунам пеш сылне лийыныт, – каласыш уремыште кожым ужалыше.

– Да шым шоналте. Айда, пу кеч тидыжым. У ийым кож деч посна от вашлий, – вашештыш Наташа да сумкаштыже оксагалтам кычалаш пиже.

– Теве, кучо, – ужалышылан у кагаз оксам шуялтыш.

– Тау, У ий дене!

– Мо?

– У ий дене тендам, манам.

– Туге, тендамат тыгак.

Наташа кожиме дене шуралталташ огыл манын, кидшым шуялтенрак изирак кож рӱдым кучыш. Яклака корнышто мунчалтылын, мӧҥгыжӧ ковыртатыш. Ончылгоч пелашыж дене пырля ужар кожым сӧрастарыме нерген шоналтыш. Ынде нуно ик идалык пиалан илат. Теве йӱштӧ гыч ик пӧлеман сылне пачерышкыже пурат, шыргыжалын каласа: «Darling*, кожым кучо. Теве мый ужгам гына кудашам да ме ты моторым сылнештараш тӱҥалына».

Тек кож пеш сылныжак огыл, но йӧратыме  еҥ дене пырля пайремлан ямдылалташ могай сай!  Наташа изи пачерыштыже кож тамын шарлымым шиже, офисыште чийыме ош тувыржым кишаҥдыме деч шеклана. Тудын Димаже, кожым шогалташ тыршышыла, шке семынже ала-мом чарныде мугыматылеш. Теве Наташа пелашыжым ныжылгын ӧндал шупшалеш, да пӧръеҥ тунамак лыплана.

Тыге Наташа автобус шогалме вер деке лишеме. Пайрем годым кажне гана шуко жап вучаш перна манын азаплана. Кажне кастене шпильке йолчиемже дене тошкыштын тышке вашкас. Тыге мӧҥгыжӧ пӧртылеш. Ятыр жапым тыште эртарымылан кӧра остановко илышын изи ужашышкыже савырнен. Тыште шогышыла, Наташа эреак кастен мом кочкаш шолтымо нерген шонкала.

«Визытан» шуко жап ыш вучыкто. Наташа тошкалтыш дене кӱзыш, кожым шинчыме вер пелен шогалтыш, шкежат верланыш. Шинчажым кумыш. Тунамак кажне айдемын вучымо пайремет тӱҥале веле.  Южышт тыгайым пайрем лишеммым шижмаш маныт. Тиде чын огыл. Тиде пайремак. Чын пайрем!

Наташа шинчам кумыш: эркын шыма лум велеш, йыр-ваш тымык-тымык. Йомакысе гай мамык лум коклаште Наташа пӧртшым ужо. Ик пӧлеман пачерысе окнашт тул дене волгалтеш. Шонен лукмо тӱня чоным налын да тӱрлӧ тӱсан тул дене чолгыж волгалтын. Йоча жап годсо кож вуйысо шӱдырын чӱкталтмыже шӱмым утларак пырткыкта. Уремыште рвезе-влак У ий модышым пудештыл юарлат.

Кож укшышто модыш-влак гирляндысе тул ылыжме годым ныл лукан шӱдырла чолгыжыт. Диман ош тувыран, лӱмдымварнясе шӧртньӧ шергашан  кидше пытартыш янда модышым – ош лум пырчан канде шарым – сакыш. Шыман Наташам ӧндале.  Наташат Диман ӱшанле вачышкыже вуйжым пыштыш.

Жап эркын кас сийым тамлаш темлен.

Латкокыт деч ончычрак изиш арака деч руштылдалше лийман. Наташа тугакат Диман ныжылгылыкше дене руштын шуктен. Но трук йолташ ӱдыр-влак пурат, а Наташа орвуян гын... Йолташ ӱдыр-влак  пайрем годым айык еҥым огыт пагале, тыгай айдеме шкем сӧсна семын шижаш мешаяс. Чыланат нунынлак койышт ман шонат. Шотдымо койышым йӱшӧ улмышт дене умылтараш лиеш, шонат. Садлан чылан иктӧр подылышт манын, тӱткын эскерат.  Наташа шке чаркажым йӱын ок пытаре гын, юмо арале. Чӱҥген пытарат. Да эше утларак сӧсна койышым ончыктат.

Дима салатым кочкеш да пелашыжын шолтен моштымо усталыкшым мокта. Наташа пелашыжын шампанскийым почаш тӧчымыжым ончен, элнен каен воштылеш. А трук огына шукто? Шуктена!

Москвасе курант кыра. Икмыняр тат коклаште Йӱштӧ кугызан вургемжым чиен шогалше Диман шинчаже йӱла. Пӧлек-влак. И, конешне, кужун да тамлын шупшалалтмаш, да ты шупшалалтмаш арака дечат коч руштыктара…

…Наташа автобус гыч кожым волтыш. Пӧртшӧ деке миен шуо, толашен-толашен, кожым лифтыш пуртыш. Омсаш йыҥгыртыш. Шып. «Очыни, иктаж-мом налаш монден», – сумкаште сравочым кычалшыжла шоналтыш Наташа.

Пачерысе пычкемыш могырым шергылтарыш. Наташа кожым пурымаштак коден, кемымат ыш кудаш, пӧлемышке эртыш. Тулым чӱктыш. Азапланен, йырым-ваш ончале. Ӱстел ӱмбалне ош кагаз кия. Клеткан тетрадь лышташеш ала-мом возымо. Наташа Диман кидшым палыш.

«Наташенька, нелеш ит нал, ме йолташем-влак дене ваш йыҥгыртен,  У ийым пырля вашлияш кутырен келшышна. Весела лиеш. Ит ойгыро.

Дима».

Наташан кӧргыжӧ роп кӱрылтӧ. Копаж дене чурийжым петырен, шортын колтыш.

 

***

 

У ийым Наташа ача-аваж дене вашлие. Шагал мутланыш, но шуко подыльо. Эрдене укшинчыктыш. Арака деч огыл, конешне, нелеш налме дене. Лийын кертеш арака дечат...

Кастене мӧҥгыжӧ пӧртыльӧ. Йырым-ваш пустала чучо. Чонлан йӧсо лие. Пурымаштак шогышо ужар кожын чыла имыже Диман чурийышкыже керылтше ыле, шоналтыш. Леведышыш пӱтырналтын мален колтыш.

Эрдене тудым омса йыҥгыр помыжалтыш. Наташа омсам почо. Лондем воктене Михайлов шоген. Эре тыге лиеш: вате-влак ала-могай татыште шке марийыштым фамилий дене ойлаш тӱҥалыт. Наташа шкежат ыш умыло: молан ончылныжо шогышо айдемым «Дима» манын ыш шоналте, а «Михайлов» манын палемдыш. Пондашан, арака дене ӱпшышӧ пелашыжым ончен, Наташа умылыш: ынде эре тыге лиеш.  

----------------

Darling – шергаканем (англ.).

   





Зоялан серыш
Сайт радам
Яндекс.Метрика

 1